ගණේමුල්ල සංජීව ඝාතනයට සම්බන්ධ වී මේ වනවිට සැඟව සිටින ඉෂාරා සෙව්වන්දි අනුරාධපුර ප්‍රදේශයේ හෝටලයක සිටින බවට ලද තොරතුරක් මත ඊයේ (01) සෝදිසි මෙහෙයුමක් සිදුකර තිබෙනවා.
පොලීසිය පවසන්නේ, එහිදී ඇයගේ රුවට බොහෙවින් සමාන කාන්තාවක් සහ පිරිමි පුද්ගලයෙකු සමඟ මත්ද්‍රව්‍ය තොගයක් සොයාගත් බවයි.
ඔවුන් සන්තකයේ තිබී මත්ද්‍රව්‍ය සහ සුඛෝපභෝගී මෝටර් රථ දෙකක්ද සොයාගත් බව පොලිසිය සදහන් කළා.
කෙසේ වෙතත් ගනේමුල්ල සංජීව ඝාතනයේ ප්‍රධාන සැකකාරිය වන ඉෂාරා සෙව්වන්දි මේ වනතෙක් අත්අඩංගුවට ගැනීමට පොලිසියට හැකියාව ලැබී නැහැ.
පසුගිය පෙබරවාරි මස 19 වනදා අලුත්කඩේ අංක 05 මහෙස්ත්‍රාත් අධිකරණය තුළ දී සංවිධානාත්මක අපරාධකරුවකු වන ගණේමුල්ල සංජීව වෙඩි තබා ඝාතනය කළ අතර වෙඩි තැබීම සිදුකරන ලද වෙඩික්කරුට ප්‍රධාන සැකකාරිය වන පිංපුර දේවගේ ඉෂාරා සෙව්වන්දි නැමති කාන්තාව ආධාර අනුබල ලබාදී තිබුණා.
වෙඩි තැබීම සිදුකළ දිනයේ සිට මේ වන තෙක් ඇය සැඟව සිටින ස්ථානය සම්බන්ධයෙන් නිසි තොරතුරක් නොමැති බැවින් සැකකාරිය අත්අඩංගුවට ගැනීම සඳහා සාර්ථක තොරතුරක් ලබාදෙන අයෙකුට රුපියල් ලක්ෂ 12 ක මුදල් ත්‍යාගයක් පිරිනැමීමට පොලිස් මූලස්ථානය තීරණය කර තිබෙනවා.
තොරතුරු ලබා දිය හැකි දුරකතන අංක –
අධ්‍යක්ෂ,කොළඹ අපරාධ කොට්ඨාසය – 071-8591727
ස්ථානාධිපති, කොළඹ අපරාධ කොට්ඨාසය – 071-8591735
එමෙන්ම තොරතුරු ලබාදෙන අයගේ රහස්‍යභාවය ආරක්ෂා කිරීමට ශ්‍රී ලංකා පොලිසිය කටයුතු කරනු ඇති බවද දැනුම් දී තිබෙනවා.
