යොහානි මුළු ලෝකයටම ශ්‍රී ලංකාවේ ගෞරවය රැගෙන ගොස් ඇති බව සමගි ජනබලවේගයේ පාර්ලිමේන්තු මන්ත්‍රී හෙක්ටර් අප්පුහාමි මහතා පවසනවා.
ඒ, අද (01) පැවති ප්‍රවෘත්ති සාකච්ඡාවක් අමතමින්.
ඇය වෙනුවෙන් රැස්වී සිටින ඉන්දීය ජනකාය දෙස බැලු විට ඇයට ඇති ජනාදරය වටහාගත හැකි බවයි ඔහු පවසන්නේ.
කෙසේ නමුත් යොහානි ගීතයෙන් ඉන්දියාව අල්ලා ගන්නා අතරතුර ඉන්දීය අදානි සමාගම ශ්‍රී ලංකාව අල්ලාගනිමින් සිටින බවයි මන්ත්‍රීවරයා පෙන්වා දෙන්නේ.
වෘත්තීය සමිති වල විරෝධතා හමුවේ කොළඹ වරායේ නැගෙනහිර පර්‍යන්තය ඉන්දියාවට ලබා ගැනීමට මින් පෙර දැරූ උත්සහය ව්‍යර්ථ වූවත් බටහිර පර්‍යන්තය අදානි සමාගමට මේ වන විට ලබාදී ඇති බව ඔහු පවසනවා.
වරායේ එක් කොටසක් චීනයටත් අනෙක් කොටස ඉන්දියාවටත් ලබා දී ඇති බවත් වරායේ හදවත මෙලෙස ලබාදීම බරපතල තත්වයක් බවත් ඔහු පෙන්වා දෙනවා
“වරාය හරහා ප්‍රතිඅපනයනය කිරීම තමයි ඉන්දියාව කරන්නේ. මේක ලෝකෙ විශාල ආදායමක් ලැබෙන ව්‍යාපාරයක්. කොළඹ වරාය කියන්නේ මේ රටේ මුදුන් මල්කඩක්. කොළඹ වරායෙ ආදායම් අලුතෙන් හදන්න ඕනෙ නෑ අපේ රට පිහිටල තියෙන විදිහත් එක්ක. එහෙම තියෙද්දි මේ ණයක් හරි අරගෙන වරාවල් සංවර්ධනය කරනවා වෙනුවට චීනයට සහ ඉන්දියාවට පැවරීම අපරාධයක්” යැයි ඒ මහතා පවසනවා.
