ශ්‍රී ලංකා පොදුජන පෙරමුණු පාර්ලිමේන්තු මන්ත්‍රී තිසකුට්ටි ආරච්චි මහතා සහ සිය ඥාතීන්ගේ ප්‍රමුඛත්වයෙන් ‘ග්‍රාමීය සමූපකාර බැංකුව’ නමින් මහ බැංකුවේ මුදල් මණ්ඩලයේ අනුමැතිය නොලත් ව්‍යාජ බැංකුවක් පවත්වාගෙන යන බවට පාර්ලිමේන්තු මන්ත්‍රී චමින්ද වි‍ජේසිරි මහතා චෝදනා කර සිටිනවා.
ඒ, ඊයේ (09) දින පාර්ලිමේන්තුව අමතමින්.
අදාල බැංකුවේ ශාකා 171ක් දිවයින පුරා ඇති බවට තමන්ට වාර්තා වී ඇති බවත් තිසකුට්ටි ආරච්චි මහතා සිය දේශපාලන බලය භාවිතා කර මුදල් මණ්ඩලයේ අනුමැතියකින් තොරවත් ‘බැංකු’ යන නාමය භාවිතා කර ඇති බවත් මෙහිදී චමින්ද වි‍ජේසිරි මහතා පෙන්වා දී සිටියා.
එවැනි ‘හොර බැංකුවකට’ රජයේ අනුමැතිය ලැබුනේ කෙසේද යන්නත් එහිදී මන්ත්‍රීවරයා විමසා සිටියා.
මීට පිළිතුරු ලබා දෙමින් රාජ්‍ය අමාත්‍ය ලසන්ත අලගියවන්න මහතා පවසා සිටියේ එම බැංකු නාමයේ ‘සමූපකාර’ යන වචනය පවතින්නේ නම් පමණත් තමන්ට හෝ වෙළඳ අමාත්‍යංශයට මැදිහත් විය හැකි බවයි. නොඑසේ නම් සියළු දෙනා එක් වී මේ සම්බන්ධයෙන් මහබැංකුවට පැමිණිලි කළ යුතුව ඇති බව රාජ්‍ය අමාත්‍යවරයා පවසා සිටියා.
