පාස්කු ඉරිදා ත්‍රස්ත ප්‍රහාරයේ ප්‍රධාන සැකකාරියක වන පුලස්තිනී මහේන්ද්‍රන් හෙවත් සාරා ලංකාවට බාරදෙන්නැයි ඉන්දියාවෙන් රාජ්‍යතාන්ත්‍රික ඉල්ලීමක් නොකරන්නේ මන්දැයි සමගි ජනබලවේගය ආණ්ඩුවෙන් ප්‍රශ්න කරන්නේ යැයි පාර්ලිමේන්තු මන්ත්‍රී මුජිබර් රහුමාන් මහතා ‘නිව්ස් 19’ට පැවැසීය.
පාස්කු ඉරිදා ප්‍රහාරයෙන් පසු විදේශයන්ට පලා ගිය සියලු සැකකරුවන් අත්අඩංගුවට ගනු ලැබුවේ යහපාලන ආණ්ඩුව විසින් යැයි ද වත්මන් ආණ්ඩුව බලයට පැමිණීමෙන් පසුව කිසිදු සැකකරුවකු අත්අඩංගුවට ගෙන නැතැයි ද රහුමාන් මන්ත්‍රීවරයා කීය.
නීතිඥ හිජාස් හිස්බුල්ලා අත්අඩංගුවට ගෙන පාස්කු ප්‍රහාරයට පටලවන්නට ආණ්ඩුව උත්සාහ කරන්නේ දින පනස් දෙකේ ව්‍යවස්ථා කුමන්ත්‍රණය අවස්ථාවේදී ඔහු මැතිවරණ කොමිසමේ හිටපු කොමසාරිස් හූල් මහතා වෙනුවෙන් ඉදිරිපත්වීම නිසා යැයි ද රහුමාන් මහතා චෝදනා කළේය.
මේ ආණ්ඩුව බලයට පත්වූයේ තනිකරම පාස්කු ප්‍රහාරය විකිණීමෙන් යැයි කී හෙතෙම දැනටත් එය දේශපාලනිකව පාවිච්චි කරනු විනා සැබෑ වැරැදිකරුවන් සොයාගැනීම ආණ්ඩුව හිතාමතාම මගහැර යමින් ඇතැයි ද චෝදනා කළේය.
ආණ්ඩුව මුස්ලිම් සමාජයේ දැඩි අවිශ්වාසයට තුඩු දෙන පාලනයක නිරත වී සිටින්නේ යැයි ද ආණ්ඩුවට සහාය දුන් මුස්ලිම් මන්ත්‍රීවරුන් පිරිසට ඉදිරි මැතිවරණවලදී දේශපාලනික වශයෙන් වන්දි ගෙවීමට සිදුවනු ඇතැයි ද මුජිබර් රහුමාන් මන්ත්‍රීවරයා වැඩිදුරටත් සඳහන් කළේය.
