හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දුගෙන් රුපියල් මිලියන 500ක වන්දියක් අයකර දෙන ලෙස ඉල්ලා ජාතික ජනබලවේගයේ නායක අනුර කුමාර දිසානායක මහතා විසින් ගොනු කර ඇති පෙත්සම් පැමිණිල්ලේ වැඩිදුර සාක්ෂි විභාගය මාර්තු 24 යළි සිදු කිරීමට කොළඹ ප්‍රධාන දිසා විනිසුරු සඳුන් විතාන මහතා නියෝග කළා.
පෙත්සම අද (24) යළි කැඳ වූ අවස්ථාවේ දී පැමිණිල්ල වෙනුවෙන් අනුර කුමාර දිසානායක මහතාගේ නීතිඥවරුන් අධිකරණය හමුවේ මෝසමක් ගොනු කරමින් පැමිණිලි කරු මේවන විට ජනාධිපතිවරයා බව දන්වා තිබෙනවා.
2017 වසරේ ඔක්තෝබර් මස 15 වනදා ඒකාබද්ධ විපක්ෂය ලෙස හඳුන්වාගත් පිරිසක් “ජාතික සම්පත් සුරකිමු දේශපාලන දඩයම නවතමු” යන තේමාව යටතේ විසින් තංගල්ල නගර සභා ශාලාවේ දී පැවැති රැස්වීමකදී හිටපු අමාත්‍ය ජොන්ස්ටන් ප්‍රනාන්දු මහතා සිදු කළ ප්‍රකාශයෙන් සිය කීර්ති නාමයට හානි වී ඇති බැවින් ඒ වෙනුවෙන් රුපියල් මිලියන 500ක වන්දියක් අයකර දෙන ලෙස ඉල්ලා මෙම පෙත්සම අනුර කුමාර දිසානායක මහතා ගොනුකර තිබෙනවා.
