ආරක්ෂක හේතූන් මත හිටපු අග්‍රාමාත්‍ය මහින්ද රාජපක්ෂ මහතාව ත්‍රිකුණාමලය නාවික තටාකාංගණය වෙත රැගෙනගිය බව (විශ්‍රාමික) ජෙනරාල් කමල් ගුණරත්න මහතා පවසනවා.
අද (11) පැවති ප්‍රවෘත්ති සාකච්ඡාවකට එක්වෙමින් ඒ මහතා සදහන් කළේ රටේ තත්ත්වය සාමාන්‍ය අතට පත්වූ පසු ඔහුට කැමති ස්ථානයකට යෑම සඳහා අවශ්‍ය කටයුතු සිදුකරන බවයි.
මේ අතර කොළඹ නගරය පුරා ස්ථාන රැසක යුද හමුදාව විසින් සන්නද්ධ රථ යොදා ගනිමින් අද උදෑසන සිට ස්ථානීය මුර සංචාර ආරම්භ කර තිබෙන අයුරු දක්නට ලැබුණා.
එමෙන්ම විශේෂ බලකා යතුරුපැදි ඛණ්ඩය විසින් කොළඹ, පිටකෝට්ටේ, මිරිහාන, කිරුළපණ, කොල්ලුපිටිය ආදී ප්‍රදේශවල මුර සංචාරය කරන ආකාරයද දක්නට ලැබුණු බව අප වාර්තාකරුවන් සදහන් කළා.
මේ පිළිබදව මාධ්‍යවේදීන් කමල් ගුණරත්න මහතාගෙන් විමසා සිටියේ රට තුළ හමුදා පාලනයක් ඇතිකිරීමට සූදානමින් සිටින්නේද යන්නයි.
ආරක්ෂක ලේකම්වරයා ඊට සිනහ වෙමින් පැවසුවේ එවැන්නක් සදහා කිසිදු සූදානමක් නොමැති බවයි.
