CR&FC ක්‍රීඩා සමාජය සමඟ ලබන මස 2 වනදා CR පිටියේ පැවැත්වෙන අන්තර් සමාජ පළමු පෙළ ලීග් රග්බි තරඟාවලියේ කුසලාන වටයේ තරඟයෙන් පසු රග්බි ක්‍රීඩාවෙන් සමුගන්නා බව ජාතික කණ්ඩායමේ හිටපු නායක අග්‍රාමාත්‍ය මහින්ද රාජපක්ෂ මහතාගේ දෙටුපුත් යෝෂිත රාජපක්ෂ මහතා පවසනවා.
ඔහු සදහන් කරන්නේ තමන් වසර 15 ක් පුරා රග්බි ක්‍රීඩාවේ නිරතවෙමින් ෆ්ලෑන්කර් ස්ථානයේ ක්‍රීඩාකළ බවයි.
35 හැවිරිදි යෝෂිත රාජපක්ෂ මෙවර ලීග් තරඟාවලියේ නාවුක හමුදා ක්‍රීඩා සමාජය නියෝජනය කරනවා.
“මම රග්බි පිටියෙන් ඉවත් වුණාට පුහුණුකරුවෙක් විදිහට සම්බන්ධ වෙන්නේ නැහැ. හැම ක්‍රීඩකයාටම පුහුණුකරුවෙක් වෙන්න බැහැ. සංවිධාන කටයුතුවලදී හරි වෙනත් අංශවලින් හරි ක්‍රීඩාවට සේවය කරන්න කැමතියි. ඒත් අවස්ථාවක් ලැබුණොත් මඟඅරින්නේ නැහැ. මම රග්බි ක්‍රීඩාවට ආදරෙයි. මට අවශ්‍ය ක්‍රීඩාවෙන් මම ලැබූ දැනුම යොවුන් ක්‍රීඩකයන්ට ලබාදෙන්නයි”
පුහුණුකරුවෙක් වෙන්නෙත් නැහැ, නොවෙන්නෙත් නැහැ ආකාරයේ හතරබිහිරි කතාවක්ද යෝෂිත රාජපක්ෂ මහතා දිනමිණ පුවත්පත සමඟ පැවති සම්මුඛ සාකච්ඡාවකදී එලෙස පවසා තිබෙනවා.
“ක්‍රීඩාව දේශපාලනයෙන් තොර විය යුතුයි. ඒකට හොඳම උදාහරණය මම. 2015 වසරෙන් පසුව මාව ජාතික කණ්ඩායමෙන් ඉවත් කළේ දේශපාලන කරුණු නිසයි. දේශපාලනය සම්බන්ධ කර නොගෙනයි ක්‍රීඩා පරිපාලනය සිදුකළ යුත්තේ. ඔවුන් විදෙස් රටවල ලීග් රග්බි ක්‍රීඩාවට යොමු කිරීමට මඟ පෙන්විය යුතුයි. දේශීය රග්බි ක්‍රීඩාව දියුණු කරන්න එවැනි පියවර වැදගත් “
